ՀԱՅԱՍՏԱՆԻ ՊԵՏԱԿԱՆ ՃԱՐՏԱՐԱԳԻՏԱԿԱՆ ՀԱՄԱԼՍԱՐԱՆ /ՊՈԼԻՏԵԽՆԻԿ/

ՖԻՆԱՆՍԱԿԱՆ ՀԱՇՎԵՏՎՈՒԹՅՈՒՆՆԵՐԻ ԵՎ ԱՈՒԴԻՏԻ ԵԶՐԱԿԱՑՈՒԹՅԱՆ ՀՐԱՊԱՐԱԿՈՒՄ

seua — Thu, 01 Jul 2010 09:41:18 +0000

Հարգելի այցելուներ կից կարող եք ծանոթանալ ՀՊՃՀ 2009 թվականի ֆինանսական հաշվետվություններին և աուդիտի եզրակացությանը:

ՖԻՆԱՆՍԱԿԱՆ ԱՐԴՅՈՒՆՔՆԵՐԻ ՄԱՍԻՆ ՀԱՇՎԵՏՎՈՒԹՅՈՒՆ Ձև N 2

ԸՆԴՈՒՆԵԼՈՒԹՅՈՒՆ

seua — Wed, 12 May 2010 11:31:49 +0000

ՀԱՅԱՍՏԱՆԻ ՊԵՏԱԿԱՆ ՃԱՐՏԱՐԱԳԻՏԱԿԱՆ ՀԱՄԱԼՍԱՐԱՆԸ ՀԱՅՏԱՐԱՐՈՒՄ Է 2010/2011 ՈՒՍ. ՏԱՐՎԱ ԸՆԴՈՒՆԵԼՈՒԹՅՈՒՆ /բակալավրական կրթական ծրագիր/

Դիմորդների փաստաթղթերն ընդունվում են 2010թ. մայիսի 5-ից մինչև հունիսի 1-ը ժամը 1800-ն:

Փաստաթղթերը ընդունվում են`

ԵՐԵՎԱՆՈՒՄ – Տերյան 105, ՀՊՃՀ-ի 5-րդ մասնաշենք, 1-ին հարկ, Հեռ. 52-03-45, 52-56-71,
ԳՅՈՒՄՐԻՈՒՄ` Մ. Մկրտչյան փող. թիվ 2, Հեռ. 3-15-28,
ՎԱՆԱՁՈՐՈՒՄ` Մ. Մաշտոցի փող. թիվ 116, Հեռ. 5-85-70,ԿԱՊԱՆՈՒՄ` Գ. Արզումանյան 11, Հեռ. 5-48-80
Լրացուցիչ տեղեկություններ կարելի է ստանալ ՀՊՃՀ ընդունող հանձնաժողովներից:

Բեռնել ընդունելության տեղերի քանակը ըստ ֆակուլտետների՝ 2010-2011 ՈՒՍՏԱՐՎԱ ԸՆԴՈՒՆԵԼՈՒԹՅՈՒՆ

ՄՐՑՈՒՅԹ

seua — Tue, 16 Mar 2010 13:35:32 +0000

Հայաստանի պետական ճարտարագիտական համալսարանը (Պոլիտեխնիկ) ս.թ. մարտի 15-ից հայտարարում է մրցույթ Երևանի կրթահամալիրի «Կենսագործունեության անվտանգություն» և «Մեքենաշինության արտադրության տեխնոլոգիաներ և սարքավորումներ» ամբիոնների վարիչների թափուր պաշտոնատեղերի տեղակալման նպատակով։

Հավակնորդների դիմումների ներկայացման ժամկետը սահմանված է մինչև ս.թ. ապրիլի 15-ը:

ՑՈՒՑԱՀԱՆԴԵՍ՝ ՆՎԻՐՎԱԾ ԿԱՆԱՆՑ ՏՈՆԻՆ

seua — Tue, 16 Mar 2010 13:24:06 +0000

Մարտի 9-ին Հայաստանի պետական ճարտարագիտական համալսարանի (պոլիտեխնիկ) իգական սեռի ամենաշատ ներկայացուցիչներ ունեցող ֆակուլտետներից մեկի՝ Քիմիական տեխնոլոգիաների և բնապահպանական ճարտարագիտության ֆակուլտետի կին-դասախոսներին և աղջիկներին անակնկալ էր սպասվում: Նշված ֆակուլտետի Ուսանողական խորհուրդը, Հայկուհի Ավետիսյանի գլխավորությամբ, կազմակերպել էր ցուցահանդես` նվիրված կանանց տոնին: Ցուցադրված էին «Տարոն» գեղագիտական կենտրոնի և Մեծամորի թիվ 2 դպրոցի սաների աշխատանքները: Բացի այդ, ամեն դասամիջոցին մասնաշենքի բակում և նախասրահում հնչում էր երաժշտություն, իսկ մասնաշենք մտնող բոլոր կանանց և աղջիկներին սպասվում էր անակնկալ՝ ծաղիկ և շնորհավորական բացիկ: Այսպես Ուսանողական խորհուրդը փորձել էր գեղեցկացնել լուսավոր գարնանային տոնը:

Կազմակերպված միջոցառմանը մասնակցեցին թե՜ ուսանողները, և թե՜ «փոքրիկ նկարիչների» ծնողները: Ցուցահանդեսից հետո նկարների հեղինակների մեծ մասը նշեց, որ հետագայում բուհի և մասնագիտության ընտրության հարցում, անտարակույս, նախապատվությունը տալու է Պոլիտեխնիկին: Երեխաներն իրենց ընտրությունը պայմանավորեցին նրանով, որ մի ժանի ժամվա ընթացքում հնարավորություն ունեցան բավականաչափ ծանոթանալու մեր համալսարանին և այստեղ տիրող ջերմ ու բարեկամական մթնոլորտին:

ԳԻՏԱԿԱՆ ԽՈՐՀՐԴԻ ՆԻՍՏՈՒՄ

seua — Sat, 27 Feb 2010 15:00:55 +0000

Փետրվարի 27-ին տեղի ունեցավ Հայաստանի պետական ճարտարագիտական համալսարանի (Պոլիտեխնիկ) Գիտական խորհրդի հերթական նիստը, որին մասնակցում էր նաև համալսարանի Կառավարման Խորհրդի նորընտիր նախագահ, ՀՀ ԱԺ նախագահի տեղակալ Սամվել Նիկոյանը:

Նիստում հաղորդման տեսքով ներկայացվեց 2011թ. դպրոցների շրջանավարտության բացակայության և դրա արդյունքում 2011-2012 ուսումնական տարում դիմորդների թվաքանակի կտրուկ նվազման հետևանքով ՀՀ բուհերի առջև ծառացած խնդիրները, ինչպես նաև նշված տարում ընդունելության սպասվող դժվարությունների հաղթահարման համար ՀՊՃՀ-ում ստեղծված հանձնախմբի աշխատանքները: Մասնավորապես, մանրամասն վերլուծությամբ ներկայացվեց առկա ու սպասվելիք իրավիճակները, և ուրվագծվեցին այն ուղիներն ու միջոցները, որոնք թույլ կտան հնարավորինս դիմակայելու ուսանողական բեռնվածքի նվազման հետևանքով ծագող խնդիրներին:

Փետրվարի 16-ին ՀՊՃՀ Կառավարման Խորհրդի նիստում նոր ընտրված նախագահ Ս. Նիկոյանը խոստացել էր առավել հաճախ հանդիպել պրոֆեսորադասախոսական կազմի և ուսանողության հետ` մոտիկից ծանոթանալու համար բուհի գործունեությանը և գոյություն ունեցող հիմնախնդիրներին: Հետամուտ լինելով իր խոստմանը` նա ակտիվ մասնակցեց վերոնշյալ հարցի շուրջ ծավալված բուռն քննարկմանը և կոչ արեց բոլորին միահամուռ կերպով ուժերն ուղղել սպասվելիք խնդիրների հաղթահարմանը: «Պոլիտեխնիկն այն հաստատությունն է, որի շրջանավարտներն ավարտելուց հետո նույնիսկ չեն մոռանում հարազատ կրթօջախին և իրենց ներուժի չափով օժանդակում են համալսարանին: Օգտագործելով իմ իրավունքներն ու պարտականությունները ողջ ծավալով` ձեզ հետ միասին կաշխատենք փնտրել տարբերակներ, աղբյուրներ իրադրությունից նվազագույն կորուստներով դուրս գալու համար»,- նշեց պ-ն Նիկոյանը:

Քննարկումից հետո որոշում կայացվեց մշակել և հաջորդ Գիտխորհրդի նիստի հաստատմանը ներկայացնել միջոցառումների հստակ ժամանակացույց, որի իրականացումը հնարավորություն կտա մեղմել առաջիկա դեմոգրաֆիական մարտահրավերները:

Գիտական խորհրդի նիստի օրակարգային հարցերից էր նաև ՀՊՃՀ Վանաձորի մասնաճյուղում Հեռակա ուսուցման բաժանմունքի ստեղծումը: Քննարկման արդյունքում, հիմք ընդունելով մասնաճյուղի գիտական խորհրդի միջնորդությունը և ՀՊՃՀ Գիտական խորհրդի Կառուցվածքային փոփոխությունների ու Բոլոնիայի գործընթացի ներհամալսարանական համակարգման մշտական հանձնաժողովի երաշխավորությունը, Գիտական խորհուրդը որոշեց Հայաստանի պետական ճարտարագիտական համալսարան (Պոլիտեխնիկ) պետական ոչ առևտրային կազմակերպության Վանաձորի մասնաճյուղում ստեղծել Հեռակա ուսուցման բաժանմունք:

ՀԱՂՈՐԴԱԳՐՈՒԹՅՈՒՆ ԵՐՊԻ ՇՐՋԱՆԱՎԱՐՏՆԵՐԻ ԵՎ ԲԱՐԵԿԱՄՆԵՐԻ ԼՈՍ ԱՆՋԵԼԵՍԻ ՄԻՈՒԹՅՈՒՆԻՑ

seua — Fri, 29 Jan 2010 07:00:18 +0000

ԵրՊԻ շրջանավարտների և բարեկամների Լոս Անջելեսի միության նախագահ է ընտրվել Ամերիկահայ ճարտարագետների և գիտնականների ընկերակցության խորհրդի անդամ, ԵրՊԻ շրջանավարտ ԱԲՐԱՀԱՄ ԲՈՅԱՋՅԱՆԸ:

Սույն հաղորդագրությունը ստացվել է
ԵրՊԻ շրջանավարտների և բարեկամների
Լոս Անջելեսի միության նախկին նախագահ
ՀԱՐՈՒԹՅՈՒՆ ՍՈՒՐՄԵՆՅԱՆԻՑ

ԳԻՏԱԿԱՆ ԽՈՐՀՐԴԻ ՀԵՐԹԱԿԱՆ ՆԻՍՏ

seua — Wed, 27 Jan 2010 07:14:50 +0000

Օ Ր Ա Կ Ա Ր Գ

Գիտական խորհրդի 2010թ. հունվարի 30-ի ընդլայնված նիստի

Հայտարարություններ

1.   ՀՊՃՀ 2008/2009 ուսումնական տարվա գործունեության վերաբերյալ հաշվետվության քննարկում (Ո.Մարուխյան)
2.   ՀՊՃՀ ներքին կարգապահական կանոնների հաստատում (Լ.Հովհաննիսյան)
3.   ՀՊՃՀ մագիստրատուրայի անվճար և տարկետման իրավունքով վճարովի ընդունելության և հարակից բակալավրական մասնագիտությունների ցանկի վերաբերյալ (Ս.Աղբալյան)
4.   ՀՊՃՀ 2010թ. հրատարակչական պլանի քննարկում և հաստատում (Ս.Մամյան)
5.   Մրցութային հարցեր (Հ.Բալաբանյան)
6.   Ընթացիկ հարցեր

Նիստը տեղի կունենա 2010թ. հունվարի 30-ին ժամը 10:00-ին` ՀՊՃՀ թիվ 1 մասնաշենքի Գիտական խորհրդի նիստերի դահլիճում (1301 սենյակ):

Գիտական քարտուղար
Հ. Բալաբանյան

ԳԻՏԵԼԻՔԻ ՏԱՐԻ ԱԶԳԱՅԻՆ ԲԱՆԱԿՈՒՄ

seua — Tue, 26 Jan 2010 07:17:32 +0000

Երեկ Երևանի պետական համալսարանում տեղի ունեցավ ՀՀ Պաշտպանության նախարար, գեներալ-գնդապետ Սեյրան Օհանյանի հաճելի ավանդույթ դարձած հանդիպումը ՀՀ բուհերի պրոֆեսորադասախոսական անձնակազմի և ուսանողության ներկայացուցիչների հետ: ԵՊՀ Պալյանների դահլիճը լեփ-լեցուն էր: Հանդիպմանը ներկա էր նաև Հայաստանի պետական ճարտարագիտական համալսարանի ռեկտոր, պրոֆեսոր Ո. Մարուխյանը:

Նմանատիպ հանդիպումները թե դպրոցներում, թե բուհերում արդեն իսկ ավանդույթ են դարձել ոչ միայն նախարարի, այլ նաև ՀՀ Պաշտպանության նախարարության (ՊՆ) ղեկավար կազմի համար և ուղղված են հասարակություն-բանակ, դպրոց-բանակ, բուհ-բանակ կապերն ամրապնդելուն:

«Այսօր, կանգնած լինելով մի շարք արտաքին սպառնալիքների առջև, մեր ազգի համար օրախնդիր է ռազմահայրենասիրական դաստիարակության ուղղությամբ տարվող ծրագրերի, աշխատանքների բարեհաջող իրականացումը, որտեղ իր անշեղելի դերն ունի գիտելիքը»,-այսպես սկսեց նախարարն իր «Բանակը և կրթությունը» զեկույցը` նախապես ողջունելով ներկաներին իր և Պաշտպանության նախարարության ղեկավար անձնակազմի անունից: Իր խոսքում Զինված ուժերի (ԶՈՒ) ղեկավարը, արժեվորելով ՀՀ բանակի կայացման ճանապարհը, հակիրճ անդրադարձավ ՀՀ ԶՈՒ ձևավորման, զարգացման հաստատման 18-ամյա ժամանակահատվածին, ռազմական կրթությանը, ուսումնական հաստատությունների հետ ակնկալվող համագործակցությանը, բանակաշինությանը և այս առումով կատարվելիք բարեփոխումներին: «Աշխարհաքաղաքական զարգացումներն այնպիսին են, որ պետության բոլոր ուղղությունների զարգացման գործում մեծ դերակատարում ունի երիտասարդությունը` իր ներուժով, ունակություններով և գիտելիքներով»,-նշեց նախարարը:

Այնուհետև, Ս. Օհանյանը սիրահոժար պատասխանեց

Էներգետիկական ֆակուլտետի ուսանող Ղևոնդ Ղազարյանը պարգևատրվեց նախարարի արժեքավոր նվերով

ներկաների բազմաթիվ հարցերին, որին հաջորդեց ՀՀ ԶՈւ կազմավորման 18-րդ տարեդարձի կապակցությամբ և մատաղ սերնդի ռազմահայրենասիրական դաստիարակության գործում ունեցած ավանդի համար սահմանափակ թվով բուհերի դասախոսների, աշխատողների և ուսանողների պարգևատրումը ՊՆ գերատեսչական մեդալներով, պատվոգրերով ու արժեքավոր նվերներով:

ՏՀ ֆակուլտետի դոցենտ Հեկտոր Բաղյանը պարգևատրվեց ՀՀ զինված ուժերի «Մարշալ Բաղրամյան» մեդալով

ՀՀ Պաշտպանության նախարարի հրամանով Տրանսպորտային համակարգերի ֆակուլտետի դոցենտ, տ.գ.թ., արցախյան ազատամարտի մասնակից Հեկտոր Բաղյանը պարգևատրվեց ՀՀ զինված ուժերի «Մարշալ Բաղրամյան» մեդալով, իսկ Էներգետիկական ֆակուլտետի բակալավրատի 3-րդ կուրսի ուսանող Ղևոնդ Ղազարյանը` նախարարի արժեքավոր նվերով:

Ի դեպ, 2010 թվականը բանակում հայտարարված է գիտելիքի տարի:

ՇՆՈՐՀԱԿԱԼԱԿԱՆ ՆԱՄԱԿ ԲԱՈՒՄԱՆԻ ԱՆՎԱՆ ՄՈՍԿՎԱՅԻ ՊԵՏԱԿԱՆ ՏԵԽՆԻԿԱԿԱՆ ՀԱՄԱԼՍԱՐԱՆԻՑ

seua — Sun, 24 Jan 2010 07:03:47 +0000

Օրերս Հայաստանի պետական ճարտարագիտական համալսարանի (Պոլիտեխնիկ) ռեկտոր Ո. Մարուխյանի անունով նամակ է ստացվել համալսարանի գործընկեր Ռուսաստանի Դաշնության Բաումանի անվան Մոսկվայի պետական տեխնիկական համալսարանի (ՄՊՏՀ) ռեկտոր, ՌԴ Գիտությունների ակադեմիայի ակադեմիկոս, ԱՊՀ երկրների Տեխնիկական համալսարանների ասոցիացիայի նախագահ Իգոր Ֆյոդորովից, որում, ի հավելումն ՀՊՃՀ-ին և ողջ պրոֆեսորադասախոսական անձնակազմին ուղղված ամանորյա շնորհավորանքների, պ-ն Ֆյոդորովն իր գոհունակությունն է հայտնում ռեկտորին ընդհանուր տեխնիկական կրթությանն ու գիտությանը վերաբերող հարցերում համալսարանի ցուցաբերած ակտիվության համար` ի նպաստ Տեխնիկական համալսարանների ասոցիացիայի և ՄՊՏՀ-ի հետ համագործակցության բարեհաջող զարգացման: Նամակում, մասնավորապես, նշված է. «…հույս եմ հայտնում, որ 2010թ. համալսարանական մեր ասոցիացիան հաջողությամբ կհաղթահարի բարձրագույն մասնագիտական կրթության բարեփոխումների ճանապարհին կանգնած բոլոր խոչընդոտները` պահպանելով և, միաժամանակ, շարունակելով ազգային կրթական համակարգերի լավ ավանդույթները»:

ՈՍԿԵ ՄԵԴԱԼ ՎԱՆԱՁՈՐԻ ՄԱՆԿԱՎԱՐԺԱԿԱՆԻՆ

seua — Tue, 19 Jan 2010 21:03:22 +0000

Հայաստանի պետական ճարտարագիտական համալսարանի (Պոլիտեխնիկ) Ռեկտորատի որոշմամբ Վանաձորի Հովհ. Թումանյանի անվան պետական մանկավարժական ինստիտուտին հիմնադրման 40-ամյակի կապակցությամբ շնորհվում է ՀՊՃՀ Ոսկե մեդալ:

Կիրովականի պետական մանկավարժական ինստիտուտը հիմնադրվել է 1969թ.` ունենալով 16 ամբիոն և 117 հոգուց բաղկացած դասախոսական կազմ: Կարճ ժամանակահատվածում այն դառնում է մարզի և քաղաքի կրթագիտական ու մշակութային օջախներից մեկը: 2001թ. ինստիտուտն անվանակոչվում է հայ հանճարեղ բանաստեղծ Հովհաննես Թումանյանի անունով: Ներկայումս ինստիտուտը սերտ համագործակցում է ՀՊՃՀ Վանաձորի մասնաճուղի հետ` նպաստելով տարածաշրջանի գիտական ներուժի զարգացմանը: